Tódalas enquisas sobre os principais problemas que teñen os cidadáns apuntan á vivenda e ó acceso á mesma como un dos asuntos que máis preocupan.
Si nos poñemos a falar cun grupo de mozos e mozas que estean a buscar emprego ou que o atoparan aínda que este sexa precario, o primeiro que manifestan é o seu interese por atopar unha vivenda onde comezar a construir o seu proxecto vital.
Por iso non dou quitado da cabeza o caso das vivendas sociais de Xarás-Ribeira. Un proxecto de 21 vivendas protexidas do cal se comezou a falar no ano 2000. Daquela os responsables do PP na Xunta e no concello de Ribeira visitaban a zona onde se ían a construir as citadas vivendas.
Nos anos sucesivos os mesmos responsables seguiron a vender fume e prometer a execución deste proxecto. Chegou o 2005(ano electoral) e adxudicaron o proxecto, poñendo Núñez Feijóo a primeira pedra. Naquel ano había 50 familias que querían optar a estas vivendas.
O ano pasado as 21 vivendas foron paralizadas na súa construcción xa que a empresa adxudicataria tivo problemas froito da baixa no proceso de adxudicación, co cal chegouse á rescisión do contrato, ou eso foi o que me transmitiu o Sr. Pino Director do IGVS a finais do ano 2006, en resposta a unha iniciativa que presentei no Parlamento de Galicia.
Agora estamos no ano 2007 e facendo un seguimento daquela actuación e das respostas obtidas fai uns meses, volvo a reclamar a presencia do Director do IGVS e dos responsables da Consellería de Vivenda a través dunha iniciativa parlamentaria para que nos expliquen as previsións existentes ó respecto da finalización de ditas vivendas.
Será o 2008 ? Será o 2009 o ano de finalización? o 2010? A min este tipo de situación parécenme unha burla á cidadanía. Paréceme unha falta de respecto ós administrados que dende o ano 2000 se lles diga que se van construir 21 vivendas e que esteamos no 2007 e non saibamos aínda para cando …. Alguén se imaxina que a unha empresa lle levara 9 anos facer 21 casas?
E paréceme unha burla porque o acceso á vivenda é unha das principais inquietudes que ten a mocidade deste País, e paréceme sano que de cando en vez pensemos en voz alta e reflexionemos sobre o feito de que estamos en política para resolver estas cousas, as que realmente lle importan ós cidadáns, …. claro que si teñen que agardar 9 anos por unha vivenda … non me extraña que despois sexan incrédulos cando lles contamos algunhas cousas.
Quero que a política cambie, por cousas como estas, e por outras moitas que non me gustan, e porque entendo que precisamos dar respostas ós problemas que realmente lle preocupan ós cidadáns.
Dordo escribiu:
Estimado Xosé Manuel:
O que tedes que facer é poñer ó frente do IGVS a Quintáns Vila, excelso ex-alcalde de Porto do Son e plusmarquista mundial en licitación de vivendas. Véxase senón o caso das licencias concedidas en Porto do Son nestes catro últimos anos.
Este home, acábavos co problema da carestía da vivenda nun pis-pas.
lage escribiu:
Estimado Dordo, sinto que todo o que teñas que comentar sobre o particular sexa aludir a Ramón Quintáns, ex-alcalde de Porto do Son.
Eu respecto as túas opinións sobre Porto do Son, tanto as que aquí publicas como outras que che leo noutros sitios da rede, pero non che parece que está chegando á obsesión o feito de que sempre aludas ó mesmo.
Agardo que poidamos coincidir nalgún foro e así poder comentar aquelas cuestións que seguramente nos interesen e nas cales poidamos aportar cousas.
apertas
Dordo escribiu:
Douche a razón, Lage . Lástima,que a actitude do voso partido con este persoaxe fose tan comprometida, perdéstedes moito de credibilidade neste caso, e é convinte recordárvolo un día sí e outro tamén porque foi responsabilidade do PSOE a desfeita de Porto do Son. Gústeche ou non a ti e a Blas García.
De calqueira xeito, comento algo máis: o tema da vivenda non se vai a resolver en absoluto cuns cantos pisiños aquí e outros acolá. Namentres non se reforme e se dote de medios ós Concellos para non dependan das recalificacións; namentras decisións administrativas podan facer millonarios a uns en cuestión de horas; mentras os alcaldes podan aprobar PAUs por decreto; en canto siga existindo a figura do Axente Urbanístico, que moito se criticaba na oposición, pero agora tanto se defende… teremos carestía da vivenda para un bo tempo. ¿Qué fixéstedes nestes dous anos para aliviar esta situación?
En Madrid, polo menos, andan a voltas cunha reforma do tema. Pero aquí nada de nada.
¿Será que estamos contentos?
Xa virá a corrección que nos porá a todos os pes na terra.
lage escribiu:
Dordo, o tema da vivenda como ti dis, é ó meu xuizo un dos asuntos centrais da axenda política.
O que temos feito dende o Partido Socialista é impulsar a modificación da lei do solo estatal, entre outras medidas, aínda sabendo todos que as CC.AA. teñen unha importante competencia en materia de vivenda.
Penso que nos atopamos diante de dúas dificultades: a falta de recursos das facendas locais e a falta dun plan de vivendas protexidas en réxime de aluguer ou venda (o último plan ambicioso que recordo, realizouse baixo os gobernos de Felipe González e suscitou unha gran controversia entre Solchaga que se opoñía a incluilo no programa electoral e a maioría do partido que o defendeu e o levou adiante dende o goberno)
Pois sí, penso que é unha asignatura pendente e neste novo período de sesións que se abrirá en setembro, o goberno galego remitirá ó parlamento unha lei sobre a vivenda protexida.